மன்னார் துப்பாக்கிச் சூடு - பின்னணியில் இரு கிராமங்களுக்கு இடையிலான முறுகலே காரணம் – பொலிசார்

மன்னார் நீதவான் நீதிமன்றத்துக்கு முன்பாக இன்றையதினம் இருவர் சுட்டுக் கொல்லப்பட்ட சம்பவம், நீண்ட காலமாக மன்னாரில் இடம்பெற்று வரும் கொலை சம்பவங்களின் தொடர்ச்சியே பின்னணியில் உள்ளதாக பொலிசார் தெரிவித்துள்ளனர்.

குறிப்பாக மாட்டுவண்டி போட்டி தொடர்பில் மன்னாரில் உள்ள இரண்டு கிராமங்களுக்கு இடையே நிலவும் முறுகல் காரணமாக இதுவரையில் 7 பேர் உயிரிழந்தனர்.  

இதற்கமைய, மன்னார் நீதிமன்றுக்கு அருகில் உந்துருளியில் பிரவேசித்த இருவர் மேற்கொண்ட துப்பாக்கிச் சூட்டில் 42 மற்றும் 61 வயதுடைய இருவர் நேற்று உயிரிழந்தனர்.  மன்னார் - நொச்சிக்குளம் பகுதியைச் சேர்ந்தவர்களே இவ்வாறு உயிரிழந்தனர்.

சந்தேகநபர்கள் துப்பாக்கி பிரயோகத்தை மேற்கொள்வதற்கு கைத்துப்பாக்கியை பயன்படுத்தியுள்ளனர்.

உந்துருளியில் பயணித்தவர்களில் ஒருவர் உந்துருளியில் இருந்து இறங்கி துப்பாக்கி பிரயோகத்தை மேற்கொண்டுள்ளமை தெரியவந்துள்ளது. இதன்போது நால்வர் காயமடைந்ததுடன் அவர்களில் இருவர் உயிரிழந்தனர்.

காயமடைந்தவர்களில் ஒருவர் மன்னார் மாவட்ட பொது வைத்தியசாலையிலும் மற்றுமொருவர் யாழ்ப்பாணம் போதனா வைத்தியசாலையிலும் அனுமதிக்கப்பட்டுள்ளனர்.  

இந்தநிலையில் யாழ்ப்பாணம் வைத்தியசாலையில் அனுமதிக்கப்பட்டுள்ள நபரும், உயிரிழந்த இருவரும் 2022 ஆம் ஆண்டு மன்னார் உயிலங்குளம் பகுதியில் இடம்பெற்ற இரட்டை கொலை சம்பவத்துடன் தொடர்புடையவர்கள் என்பது தெரியவந்துள்ளது.  

2022 ஆம் ஆண்டு ஜுலை 8 திகதி உயிலங்குளத்தில் நடைபெற்ற மாட்டுவண்டி சவாரி போட்டி தொடர்பான முறுகல் ஒன்றை அடுத்து ஏற்பட்ட மோதலில் ஒரே குடும்பத்தைச் சேர்ந்த இரண்டு சகோதரர்கள் படுகொலை செய்யப்பட்டனர்.

அதற்கு பழிவாங்கும் நடவடிக்கையாக 2023 ஆம் ஆண்டும் ஓகஸ்ட் மாதம் 23 ஆம் திகதி மன்னார் அடம்பன் பகுதியில் இரண்டு பேர் சுட்டுக் கொல்லப்பட்டனர்.

அதன் தொடர்ச்சியாகவே நேற்றைய தாக்குதல் சம்பவமும் இடம்பெற்றுள்ளதாக பொலிசார் தெரிவிக்கின்றனர்.

உயிலங்குளம் பகுதியைச் சேர்ந்த ஜேசுதாசன் என்ற போதைப் பொருள் வர்த்தகர் ஒரு தரப்பு கொலையுடன் தொடர்புப்பட்டுள்ளதாகவும் அவர் தற்போது வெளிநாட்டில் உள்ளதாகவும் காவல்துறையினர் குறிப்பிடுகின்றனர்.

குறித்த நபரை கைது செய்வதற்கான சர்வதேச பிடியாணை பிறப்பிக்கப்பட்டுள்ளதாக தெரிவிக்கப்படுகிறது.

இதேவேளை, நாட்டில் தற்போது வாள்வெட்டு சம்பவங்களும், துப்பாக்கிச்சூட்டு சம்பவங்களும் அதிகரித்து வருவதாக பலதரப்பட்டவர்களும் சுட்டிக்கட்டி வருவதுடன் அவை உடனடியாக கட்டப்படுத்தப்பட வேண்டும் எனவும் வலியுறுத்தியவுகின்றமை குறிப்பிடத்தக்கது

000