கொரோனா சிகிச்சை மையமாக மாறிய நீதிமன்றம்

திண்டுக்கல் மாவட்டத்தில் கொரோனா தொற்று தீவிரமாக பரவி வருகிறது. இதுவரை சுமார்17 ஆயிரம் பேர் பாதிக்கப்பட்டுள்ளனர். கொரோனா நோயாளிகளுக்கு சிகிச்சை அளிக்க திண்டுக்கல் அரசு மருத்துவமனையில் 390 படுக்கை, எம்.வி.எம் மகளிர் கல்லூரியில் 160 படுக்கை, பழனி அரசு மருத்துவமனையில் 100 படுக்கை வசதி செய்யப்பட்டுள்ளன.

இது தவிர காந்தி கிராமம் மற்றும் மாவட்டத்தில் உள்ள அனைத்து அரசு மருத்துவமனைகளில் தனி சிகிச்சைப் பிரிவு செயல்பட்டு வருகின்றன. இந்நிலையில் கொரோனா நோயாளிகளின் எண்ணிக்கை தற்போது அதிகரித்து வருவதால் போதிய படுக்கை வசதி இல்லாத சூழ்நிலை ஏற்பட்டது.

திண்டுக்கல் அரசு மருத்துவமனையில் சிகிச்சை பெற வந்த கொரோனா நோயாளிகள் படுக்கை இன்றி சிகிச்சை பிரிவுகளின் நடைபாதையில் படுக்க வைத்து சிகிச்சை அளிக்கும் நிலை உருவானது.

இதை தவிர்க்க மாவட்ட நிர்வாகம் மற்றும் மருத்துவத் துறை சார்பில் திண்டுக்கல்லில் உள்ள பழைய நீதிமன்ற கட்டிடத்தை கொரோனா சிகிச்சை மையமாக மாற்ற நடவடிக்கை எடுக்கப்பட்டது.

இதையொட்டி திண்டுக்கல் பழைய நீதிமன்றக் கட்டடத்தில் செயல்பட்டு வந்த அரசு செவிலியர் பயிற்சி பள்ளி, புனித வளனார் பெண்கள் மேல்நிலைப பள்ளி வளாகத்தில் உள்ள செசிலியாள் நடுநிலைப் பள்ளிக்கு தற்காலிகமாக இடமாற்றம் செய்யப்பட்டுள்ளது.

பழைய நீதிமன்ற கட்டிடத்தில் கொரோனா சிகிச்சை மையம் அமைக்கப்பட்டது. இந்த சிகிச்சை மையம் நேற்று முதல் செயல்படத் தொடங்கியது. தரைத்தளம் உள்பட 3 தளங்களைக் கொண்ட அந்த கட்டிடத்தில் 200 படுக்கை வசதிகள் செய்யப்பட்டுள்ளன.