32 மில்லியன் ரூபா செலவில் நிர்மாணிக்கப்பட்ட நீர்ப்பாசனத் திட்டம் செயலிழந்த நிலையில் குடிநீர் இன்மை என பல்வேறு சிரமங்களை எதிர்கொள்ளும் பிரதேசமக்கள்

மாயவனுார் புழுதியாறு குளத்தின் ஏற்று நீர்ப்பாசனத் திட்டம் 32 மில்லியன் ரூபா செலவில் நிர்மாணிக்கப்பட்டு எட்டு ஆண்டுகளுக்கு மேலாக செயலிழந்த நிலையில் காணப்படுவதுடன் குறித்த பிரதேசத்தில் தற்போது வறுமை  குடிநீர் இன்மை என பல்வேறு  சிரமங்களை எதிர்கொண்டு வருவதாக  பிரதேசமக்கள் தெரிவித்துள்ளனர். 

கடந்த 1983 ஆம் ஆண்டு இனக்கலவரத்தால் பாதிக்கப்பட்டு மலையகத்தில் இருந்து இடம் பெயர்ந்து வந்த மலையகத் தமிழ் மக்களே மாயவனூர்; பகுதியில் அதிகம் வசித்து வருகின்றனர்.                                           அடிப்படை வாழ்வாதார வசதிகள் எதுவும் அற்ற நிலையிலும் தற்போதைய வரட்சி வரட்சி காரணமாக  குறித்த பகுதியில் கிணறுகளில் கூடத் தண்ணீரில்லாத நிலை  காணப்படுகின்றது.

குறித்த பிரதேசத்தில் கடந்த 2015ம் ஆண்டு  வடக்கு மாகாண சபையால் 320 இலட்சம் ரூபா செலவில் உருவாக்கப்பட்ட புழுதியாறு ஏற்று நீர்ப்பாசனம் முற்று முழுதாக செயலிழந்துள்ளது.

அதாவது 2014ம் 2015 ஆம் ஆண்டுகளில் மாகாண குறிததொதுக்கப்பட்ட நிதியிலிருந்து 320 இலட்சம் ரூபா செலவில் உப உணவு பயிர்ச்செய்கையை நோக்கமாக கொண்டு மாயவனூர் பிரதேசத்தில் நடைமுறைப்படுத்தப்பட்ட புழுதியாறு ஏற்று நீர்ப்பாசனம் தற்போது எவ்வித பயன்பாடும் இன்றி காணப்படுகிறது.

 இவ்வாறு பெருந்தொகையான நிதியைச் செலவிட்டும் குறித்த கிராமத்தில் வாழும் மக்களுக்கு எந்த நன்மைகளும் ஏற்படவில்லை தற்போது குடிநீர் வசதியின்மை வாழ்வாதார வசதியின்மை மற்றும் வறுமை காரணமாக பல்வேறு நெருக்கடிகளை குறித்த பிரதேச மக்கள் எதிர்கொண்டு வருவதாக தெரிவித்துள்ளனர்.