முன்னாள் லோக்சபா சபாநாயகர் சுமித்ரா மகாஜன் காலமானதாக பதிவிட்ட காங்., தலைவர் சசி தரூர் - நலமுடன் இருப்பதாக பா.ஜ., பதில்

முன்னாள் லோக்சபா சபாநாயகர் சுமித்ரா மகாஜன் காலமானதாக, மூத்த காங்., தலைவர் சசி தரூர் டுவிட் செய்தார். சுமித்ரா நலமுடன் இருப்பதாக பா.ஜ.,வின் கைலாஷ் விஜய் வர்க்கியா தெரிவித்ததையடுத்து, சசிதரூர் தனது டுவிட் பதிவை நீக்கினார்.பா.ஜ., மூத்த தலைவரும், முன்னாள் லோக்சபா சபாநாயகருமான சுமித்ரா மகாஜன் உடல் நலக்குறைவு காரணமாக காலமானார் எனவும் அவரது ஆத்மா சாந்தியடையட்டும் எனவும் காங்., மூத்த தலைவர் சசிதரூர் டுவிட் செய்திருந்தார். இதனையடுத்து சமூக வலைதளங்களில் அவரது மறைவுக்கு வருத்தம் தெரிவித்து கருத்துக்களை பதிவிட்டு வந்தனர்.

இந்நிலையில், பா.ஜ., தேசிய பொதுச்செயலாளர் கைலாஷ் விஜய்வர்க்கியா, சுமித்ரா நலமுடன் இருப்பாகவும், கடவுள் அவரை நீண்ட காலம் ஆசிர்வதிப்பார் எனவும் பதிலளித்தார். இதனையடுத்து, சுமித்ரா மகாஜன் இறந்ததாக தான் பதிவிட்ட டுவிட்டை, நீக்கிய சசிதரூர், ‛நன்றி கைலாஷ் ஜி. எனது ட்வீட்டை நீக்கிவிட்டேன். இதுபோன்ற தவறான செய்திகளை பரப்பும் தீயவர்களை எது தூண்டுகிறது என நினைக்கும் போது எனக்கு ஆச்சரியமாக இருக்கிறது. சுமித்ரா ஜி உடல் நலத்துடன் நீண்ட காலம் இருக்க வேண்டும்' என பதிவிட்டார்.