காங்கிரசுக்கு ஒரு தலைவரோ கொள்கையோ கிடையாது - பிரதமர் மோடி

மேற்கு வங்காளம் மற்றும் அசாம் மாநிலங்களில் சட்டசபை தேர்தல் நடைபெறும் நிலையில், அங்கு பா.ஜனதா வேட்பாளர்களை ஆதரித்து பிரதமர் மோடி இன்று (வியாழக்கிழமை) பிரசாரம் மேற்கொண்டு வருகிறார். 

இந்நிலையில் அசாம் மாநிலம் கரிம்கஞ்சில் நடைபெற்று வரும் தேர்தல் பிரச்சாரத்தின் போது பேசிய பிரதமர் மோடி, “காங்கிரஸ் அசாமை எல்லா வகையிலும் பிளவுபடுத்தியது, அசாமை நாட்டின் பிற பகுதிகளிலிருந்து துண்டிக்கப்படுவதற்கும், அசாமின் சமூக, கலாச்சார, புவியியல் மற்றும் அரசியல் ரீதியாக அதன் கொள்கைகள் மூலம் சேதப்படுத்தியதற்கும் காங்கிரசே காரணம். பாஜக ஒவ்வொரு வழியிலும் அசாமை இணைக்க முயன்று வருகிறது.

பராக் பள்ளத்தாக்கில் ரயில் இணைப்பு மிகவும் மோசமாக இருந்தது, மக்கள் அதை சரிசெய்ய கோரியுள்ளனர். சாலைகளின் தரமும் மோசமாக இருந்தது. அசாமின் பல்வேறு பகுதிகளை அடைய மக்கள் நீண்ட தூரம் பயணிக்க வேண்டியிருந்தது. எரிவாயு இணைப்பும் கூட சரியாக இருக்கவில்லை. இந்த சூழ்நிலையிலிருந்து பாஜக அரசு அசாமை விரைவாக முன்னேற்றும்.

பல ஆண்டுகளுக்கு முன்னர், இந்த முழு பிராந்தியமும் சிறந்த இணைப்பைக் கொண்டிருந்தது. இருப்பினும், காங்கிரசின் ஊழல் மற்றும் வாக்கு வங்கி அடிப்படையிலான ஆளுகை, அசாமை இந்தியாவில் மிகவும் துண்டிக்கப்பட்ட மாநிலங்களில் ஒன்றாக ஆக்கியது.

இன்று அசாமில் வளர்ச்சி மற்றும் நம்பிக்கையின் அலை உள்ளது. இன்று அசாமில் ஒரே ஒரு பிரச்சினை மட்டுமே உள்ளது - அதுதான் வளர்ச்சி. இன்று காங்கிரஸ் மிகவும் பலவீனமாகிவிட்டது, அது எந்த அளவிற்கும் சென்று யாருடனும் கைகோர்க்க முடியும் ... நிலையான சிந்தனை இல்லாத ஒரு கட்சி அசாமுக்கு ஒரு நிலையான அரசாங்கத்தை கொடுக்க முடியுமா?

ஒருபுறம், பாஜகவுக்கு ஒரு கொள்கை, தலைமை மற்றும் நல்ல நோக்கங்கள் உள்ளன. மறுபுறம், காங்கிரசுக்கு ஒரு தலைவரோ கொள்கையோ சித்தாந்தமோ இல்லை” என்றும் பிரதமர் கூறினார்.