இயக்குநர் எஸ்.பி ஜனநாதன் காலமானார்

இயற்கை, ஈ, பேராண்மை, பொறம்போக்கு போன்ற படங்களை இயக்கியவர் இயக்குநர் எஸ்பி ஜனநாதன். இயற்கை திரைப்படத்திற்காக தேசிய விருது பெற்ற இவர், தற்போது நடிகர் விஜய் சேதுபதி, நடிகை சுருதிஹாசன் நடிப்பில் லாபம் என்ற படத்தை இயக்கியுள்ளார்.

இந்த நிலையில் லாபம் திரைப்படத்திற்காக எடிட்டிங் பணயில் ஈடுபட்டிருந்த அவர், பின்னர் வீட்டிற்கு சாப்பிட வந்தவர் வெகு நேரமாகியும் பணிக்கு திரும்பவில்லை. இதையடுத்து அவரை அழைத்து வரலாம் என அவரது உதவியாளர் சென்றிருக்கிறார். அப்போது வீட்டின் கதவு திறக்கப்பட்டு கிடந்துள்ளது. வீட்டினுள் சென்று பார்த்த போது எஸ்பி ஜனநாதன் பேச்சு மூச்சின்றி தரையில் விழுந்து கிடந்தார்.

இதையடுத்து உடனடியாக சென்னை அப்போலோ மருத்துவமனையில் அனுமதிக்கப்பட்ட அவருக்கு வெண்டிலேட்டர் உதவியுடன் சிகிச்சை அளிக்கப்பட்டு வருகிறது. மேலும் அவருக்கு மூளையில் ரத்தக்கசிவு ஏற்பட்டுள்ளதாக மருத்துவர்கள் தெரிவித்தனர்.

இந்நிலையில் இன்று மாரடைப்பு காரணமாக அவர் உயிரிழந்ததாக தெரிவிக்கப்பட்டுள்ளது. அவரது மறைவுக்கு நடிகர் ஜெயம் ரவி, விஜய் சேதுபதி உள்ளிட்ட திரைப்பிரபலங்கள் இரங்கல் தெரிவித்து வருகின்றனர்.