தங்கத்தை உடல் மற்றும் உள்ளாடைகளில் மறைத்து கடத்தல்

2.55 கிலோ தங்கத்தை உடலில் மறைத்து கடத்தி வந்த இருவரை சுங்கத்துறை அதிகாரிகள் கைது செய்தனர்.

துபாயில் இருந்து சிறப்பு விமானம் திருச்சி வந்தது. விமானத்தில் வந்த பயணிகளிடம் மத்திய வான் நுண்ணறிவு பிரிவு அதிகாரிகள் சோதனை மேற்கொண்டனர். அப்போது சந்தேகத்திற்கு இடமான வகையில் இருந்த இரண்டு பயணிகளை தனியாக அழைத்து சென்று சுங்கத்துறை அதிகாரிகள் சோதனை செய்தனர்.

சென்னையைச் சேர்ந்த ஆரோன்பாஷா மற்றும் புதுக்கோட்டையைச் சேர்ந்த சிவா ஆகிய இரு பயணிகளிடம் சோதனை மேற்கொண்ட போது அவர்கள் தனது உடல் மற்றும் உள்ளாடைகளில் ரூபாய் 1.02 கோடி மதிப்பிலான 2.55 கிலோ தங்கத்தைப் பேஸ்ட் வடிவில் மறைத்து எடுத்து வந்ததை கண்டறிந்தனர்.

அவர்களிடம் இருந்து தங்கத்தை பறிமுதல் செய்த அதிகாரிகள் இருவரையும் கைது செய்து தொடர் விசாரணை மேற்கொண்டு வருகின்றனர். திருச்சி விமான நிலையத்தில் தொடர்ச்சியாக தங்கம் கடத்தி வரும் சம்பவம் அதிகரித்து வருவது குறிப்பிடதக்கது.