உதவிக் கல்விப் பணிப்பாளர் செல்வநாயகி - நடராஜதுரை கல்விப் பணியில் இருந்து ஓய்வு பெறுகிறார்

பட்டிருப்பு கல்வி வலயத்தின் முறைசாராக் கல்விப் பிரிவில் கடமையாற்றிய உதவிக் கல்விப் பணிப்பாளர் செல்வநாயகி - நடராஜதுரை 35 வருட கல்விப் பணியில் இருந்து ஓய்வு பெற்றுள்ளார். தனது கல்விப் பணியில் மட்/பட்/குருமண்வெளி சிவசக்தி மகாவித்தியாலயம், மட்/பட்/எருவில் கண்ணகி மகா வித்தியாலயம் ஆகிய பாடசாலைகளில தனது பணியினை திறம்பட மேற்கொண்டு வந்தார். 

தொடர்ந்து பட்டிருப்பு வலயக் கல்வி அலுவலகத்தில் முறைசாராக் கல்விப் பிரிவிற்கான ஆசிரிய ஆலோசகராக 01.07.2004 இணைக்கப்பட்ட செல்வநாயகி - நடராஜதுரை அவர்கள் 21.11.2016 இல் முறைசாராக் கல்விப் பிரிவிற்கான உதவிக் கல்விப் பணிப்பாளராக பதவியுயர்வு பெற்று பட்டிருப்பு கல்வி வலயத்தின் முறைசாராக் கல்விப் பிரிவின் பணிகளை ஆற்றி வந்தார். இவர் இன்று 60 ஆவது வயதில் அரச சுற்றுநிருபத்திற்கு அமைவாக ஓய்வு பெறுகின்றார்.

செல்வநாயகி - நடராஜதுரை  அவர்கள் ஆரம்பக் கல்வியினை மட்/பட்/குருமண்வெளி சிவசக்தி மகா வித்தியாலயத்தில் ஆரம்பித்து இடைநிலை உயர்தரக் கல்வியினை மட்டக்களப்பின் பிரபலமான பாடசாலைகளில் ஒன்றான மட்/மட்/வின்சன்ட் உயர்தரப் பாடசாலையில் பயின்ற இவர் உயர்தரத்தில் சித்தி பெற்று இலங்கையின் தலைசிறந்த பல்கலைக் கழகமான பேராதனைப் பல்கலைக் கழகத்திற்குத் தெரிவு செய்யப்பட்டு கலைப்பட்டாதாரியாக தன்னை உயர்திக் கொண்டார். தொடர்ந்து பட்டமேற் கல்வி டிப்ளோமாப் பட்டத்தினையும் பெற்று கல்விப் பணியில் தடம்பதித்தார். தனது கல்விப் பணியில் மாணவர்களுக்கு இலகுவில் விளங்கக் கூடிய வகையில் தான் பயின்ற, கற்பித்த நுட்பங்களினைப் பயன்படுத்தி செயற்பாடு சார்ந்த சிறந்த கற்பித்தலை மேற்கொண்டு மாணவர்கள் மனங்களில் தனக்கென ஒரு இடத்தினைப் பெற்றுக் கொண்டார். க.பொ.த.சாதாரண தரம், க.பொ.த. உயர்தரப் பரீட்சைக்கு மாணவர்களைத் தயார்படுத்தி வெற்றியும் கண்டதன் மூலம் பெற்றார்களினதும் நன்மதிப்பையும் தனதாக்கிக் கொண்டார். அதிபர், ஆசிரியர்களுடன் கடமைசார்ந்தும், அன்பு சார்ந்தும் பழகி தனித்துவமான மதிப்பினையும் பெற்றுக் கொண்டார். கற்றல் - கற்பித்தல் பணிசார்ந்து மாத்திரம் தனது பணியினை மட்டுப்படுத்தாது கலை கலாசாரம், விளையாட்டு, இலக்கிய அரங்கு போன்ற போட்டிகளுக்கு மாணவர்களைத் தயார்படுத்தி மாணவர்கள் அதில் வெற்றிபெறுவதற்காக உழைத்ததன் மூலம்  தனது பணியில் பல்வேறு அநுபவங்களை தன்னகத்தே கொண்டவராகவும் காணப்பட்டார். 

பட்டிருப்பு வலயக் கல்வி அலுவலகத்தில் கடமையாற்றிய வேளை முறைசாரா வேலைத்திட்டங்களை முன்னின்று செயற்படுத்தினார். சமூகம் சார்ந்த, மாணவர்கள் சார்ந்த விடயங்களில் விழிப்புணர்வுச் செயற்பாடுகள், வீதி நாடகங்கள், நடைப்பயணங்கள் போன்றவற்றை முன்னெடுத்துச் சமூகச் சீர்கேடுகளைக் களைய முன்னின்று உழைத்தார். பட்டிருப்பு கல்வி வலயத்தின் இடைவிலகல் மாணவர்களை பாடசாலைகளுக்கு வரவழைத்து கனிசமானளவு இடைவிலகளைக் குறைத்தது மாத்திரமன்றி பாடத்தெரிவு வழிகாட்டல் கருத்தரங்குகளை நடாத்தி மாணவர்களுக்கு சிறந்த வழிகாட்டலை மேற்கொண்டு தனது பணியில் ஓய்வு பெறுகின்றார்.