EPF சேவைகளுக்காக ஹொட்லைன், இணையத்தளம் அறிமுகம் : மனுஷ நாணயக்கார

ஊழியர் சேமலாப நிதியத்தின் (EPF) நன்மைகள் மற்றும் ஊழியர் பதிவுக்கான சந்திப்புகளை பதிவு செய்ய, தொழிலாளர் அமைச்சு 1958 ஹொட்லைனையும், labourdept.gov.lk என்ற இணையத்தையும் நிறுவியுள்ளது.

காலையில் கோப்பினை சமர்ப்பித்தால் மறுநாள் மாலை வரை வேலைகளை முடிக்க முடியாமல் வரிசையில் நின்று நேரம் வீணடிக்கப்படுவதாக தொழிலாளர் திணைக்களத்திற்கு பல முறைப்பாடுகள் கிடைக்கப்பெறுவதாக தொழிலாளர் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார தெரிவித்துள்ளார்.

இதன் விளைவாக ஆன்லைன் சந்திப்பு அட்டவணையை வழங்க நடவடிக்கை எடுக்கப்பட்டுள்ளதாக அமைச்சர் அறிவித்தார்.

பொதுமக்கள் நேரத்தை வீணடிப்பதை விரும்புவதில்லை, எனவே அவர்கள் இப்போது தொலைபேசி அல்லது ஒன்லைன் வழியாக சேவை, நாள் மற்றும் நேரத்தை இரண்டு நிமிடங்களில் முன்பதிவு செய்யலாம் என அமைச்சர் தெரிவித்தார்.

இந்த நடவடிக்கையானது ஊழியர்களின் சேமலாப நிதியத்தின் வைப்பு தொடர்பான சேவைகளை அணுகுவதற்கு மக்கள் காத்திருக்க வேண்டிய தருணத்திற்கு முற்றுப்புள்ளி வைக்கும் என எதிர்பார்க்கப்படுகிறது.