ரூ.2,000 நோட்டுகள் அச்சடிப்பது நிறுத்தம்

கடந்த 2016-ம் ஆண்டு பணமதிப்பிழப்பு நடவடிக்கையை தொடர்ந்து, ரூ.2,000 நோட்டுகள் அறிமுகப்படுத்தப்பட்டன. கடந்த 2018-ம் ஆண்டு மார்ச் 31-ந்தேதி நிலவரப்படி, 336 கோடியே 30 லட்சம் எண்ணிக்கையில் ரூ.2,000 நோட்டுகள் இருந்தன. இது, அப்போதைய மொத்த நோட்டுகளில் 3.27 சதவீதம் ஆகும்.

ஆனால், கடந்த மாதம் 26-ம் தேதி நிலவரப்படி, புழக்கத்தில் உள்ள ரூ.2,000 நோட்டுகள் எண்ணிக்கை 223 கோடியே 30 லட்சமாக குறைந்தது. இது தற்போதைய மொத்த நோட்டுகளில் வெறும் 1.75 சதவீதம் மட்டுமே. மக்களின் பரிமாற்ற தேவையை பொறுத்து, ரிசர்வ் வங்கியுடன் ஆலோசனை நடத்தி, குறிப்பிட்ட ரூபாய் நோட்டுகளை அச்சடிக்க மத்திய அரசு முடிவு செய்கிறது.

ஆனால், 2018-2019-ம் நிதியாண்டில் இருந்தே ரூ.2,000 நோட்டுகள் அச்சடிக்க ‘ஆர்டர்’ கொடுக்கப்படவில்லை. மேலும், அந்த நோட்டுகள் அழுக்கடைந்ததாலும், சிதைந்ததாலும் புழக்கத்தில் இருந்து குறைந்து வருகிறது” என்று மத்திய நிதித்துறை இணை மந்திரி பங்கஜ் சவுத்ரி கூறினார்.