ஓ. பன்னீர்செல்வம் மனைவி காலமானார் – அரசியல் தலைவர்கள் இரங்கல்

அ.தி.மு.க ஒருங்கிணைப்பாளரும் முன்னாள் முதலமைச்சருமான ஓ.பன்னீர்செல்வத்தின் மனைவி விஜயலட்சுமி மாரடைப்பால் காலமானார். அவருக்கு வயது 63. உடல்நலக்குறைவால் கடந்த 22ம் தேதி ஓ.பி.எஸ் மனைவி விஜயலட்சுமி சென்னையில் உள்ள தனியார் மருத்துவமனையில் அனுமதிக்கப்பட்டார்.  

கடந்த இரண்டு வார காலமாக அவருக்கு தொடர் சிகிச்சை அளிக்கப்பட்டு வந்த நிலையில் இன்று காலை அவருக்கு திடீரென மாரடைப்பு ஏற்பட்டு சிகிச்சை பலனின்றி உயிரிழந்துள்ளார்.

முதலமைச்சர் மு.க.ஸ்டாலின் வெளியிட்டுள்ள இரங்கல் செய்தியில்,

அ.தி.மு.க. ஒருங்கிணைப்பாளரும், சட்டப்பேரவை எதிர்க்கட்சித் துணைத் தலைவருமான அண்ணன்  ஓ.பன்னீர்செல்வம் அவர்களின் துணைவியார் திருமதி. விஜயலட்சுமி அவர்கள், மாரடைப்பால் காலமானார் என்ற செய்தியறிந்து மிகுந்த அதிர்ச்சியும், வேதனையும் அடைந்தேன். 

இல்லத்துணையைப் பிரிந்து வாடும் அண்ணன் ஓ.பன்னீர்செல்வம் அவர்களுக்கும், அவரது குடும்பத்தினர் மற்றும் உறவினர்கள் அனைவருக்கும் எனது ஆழ்ந்த இரங்கலையும், ஆறுதலையும் தெரிவித்துக் கொள்கிறேன் எனத் தெரிவித்துள்ளார்.

பா.ஜ.க. மாநிலத் தலைவர் அண்ணாமலை தெரிவித்துள்ள இரங்கல் செய்தியில், ஓ.பன்னீர்செல்வம் மனைவி விஜயலட்சுமி இயற்கை எய்தினார் என்ற செய்தி அதிர்ச்சியை ஏற்படுத்தியுள்ளது. அண்ணன் மீளாத் துயரத்தில் இருந்து மீண்டு வர இறைவனிடம் பிரார்த்திக்கிறேன் என கூறியுள்ளார்.

திமுக எம்பி. கனிமொழி விடுத்துள்ள  இரங்கல் செய்தியில், அ.தி.மு.க ஒருங்கிணைப்பாளர் ஓ.பன்னீர் செலவம் அவர்களின் இணையரும், மக்களவை உறுப்பினர் ரவீந்திரநாத் அவர்களின் தாயாருமான விஜயலட்சுமி அவர்கள் மறைவுற்ற செய்தியை அறிந்து அதிர்ச்சி அடைந்தேன். அவர்தம் குடும்பத்தாருக்கு எனது ஆழ்ந்த இரங்கலையும் வருத்தத்தையும் தெரிவித்துக் கொள்கிறேன் என கூறி உள்ளார்.