ரஜினிகாந்த் மனதில் எழுத்தாளர் பாலகுமாரன்
மே 15 - 2018.
எழுத்தாளர் பாலகுமாரன் இறந்து போனார்.
அஞ்சலி செலுத்தி விட்டு வந்த ரஜினி அன்றைய தினம் ஒரு முக்கிய முடிவையும் எடுத்தார்.
- பாட்ஷா 2
- இனி இல்லவே இல்லை.
ஆம். சில காலமாகவே அவருக்கு அந்த எண்ணம் இடையிடையே எப்போதாவது எழுவது உண்டு.
மீண்டும் பாட்ஷாவை எடுத்தால் என்ன ?
இயக்குனர் சுரேஷ் கிருஷ்ணா போன்றவர்களும் இதை ஆதரித்தார்கள்.
'வேண்டாம்' என்று வெளியே சொல்லிக் கொண்டிருந்தாலும் ரஜினிக்கும் உள்ளுக்குள் அப்படி ஒரு திட்டம் ஓடிக் கொண்டுதான் இருந்தது.
ஆனால் அதை ஒரேயடியாக அவர் ஒதுக்கியது பாலகுமாரன் இறந்த அன்றுதான்.
ஏனெனில் பாலகுமாரன் வசனங்கள் இல்லையெனில் பாட்ஷாவுக்கு அந்த அபார வெற்றி சாத்தியமே இல்லை.
பாட்ஷாவின் வெறித்தனமான வெற்றிக்கு முக்கியமான காரணம் பாலகுமாரனின் வசனங்கள்தான்.
ரஜினியின் படங்களில் பாட்ஷா அளவுக்கு ஷார்ப்பான வசனங்கள் அதுவரை வந்ததே இல்லை.
ரஜினி பேசும் ஒவ்வொரு வசனத்துக்கும் கை தட்டல்களும் விசில்களும் காதை பிளந்தன.
"உனக்கு சீட்டு கிடைச்சாச்சு."
"தேங்க் யூ அண்ணே. ஆமா நீங்க அவர்கிட்ட என்ன சொன்னீங்க ?"
"உண்மைய சொன்னேன். "
"ஒண்ணு சொல்றேன் நல்லா தெரிஞ்சிக்க !
நல்லவங்கள ஆண்டவன் சோதிப்பான். ஆனா கை விட்டுட மாட்டான். கெட்டவங்களுக்கு ஆண்டவன் நிறைய கொடுப்பான். ஆனா கை விட்டுடுவான்.”
இது எல்லாவற்றையும் மிஞ்சி நின்றது இந்த பஞ்ச் டயலாக்.
"நான் ஒரு தடவ சொன்னா
நூறு தடவ சொன்ன மாதிரி!"
பாட்ஷா வெற்றிக்குப் பின் ரஜினிக்கு பாலகுமாரன் மீதிருந்த மதிப்பும் மரியாதையும் கூடியது.
அதனால்தான் தனது வீட்டுக்கு பாலகுமாரன் வந்தபோது அன்போடும் அளவில்லா மரியாதையோடும் மனம் குளிர்ந்து மகிழ்வோடு வரவேற்றார் ரஜினி.
பாலகுமாரன் புறப்படும்போதும் வாசல்வரை கூடவே சென்று கார் கதவை திறந்து விட்டு வழியனுப்பி வைத்தார்.
அதுபற்றி பாலகுமாரன் :
"அந்த உயரத்திற்கு வாசல் வரை வந்து என் இனோவா கதவை திறக்க வேண்டியதில்லை. வந்தார் திறந்தார். படியிறங்க கைத்தாங்கினார்.
நான்கு வருடங்கள் கழித்த சந்திப்பு. இனிமையாய் முடிந்தது. இதுதான் அழகு.”
அந்த அழகிய நட்பு 2018 மே மாதத்தில் ஒரு நாள் முடிவுக்கு வந்தது. பாலகுமாரன் மறைந்து போனார்.
ஆம். இதே மே 15 ல்தான் பாலகுமாரன் இந்த பூமியை விட்டு புறப்பட்டு போனார்.
அவரது இறுதி காலம் முழுவதும் ஆன்மீக அமைதியில் கரைந்து அப்படியே ஆகாயத்தில் கலந்து போனார்.
தன் படங்களுக்கு வசனம் எழுத பாலகுமாரனைப் போல இன்னொருவர் வர இனி வாய்ப்பே இல்லை என ரஜினியே நினைக்கும் அளவுக்கு தனக்கென ஒரு தனி இடத்தை ஏற்படுத்தி விட்டு போய் விட்டார் பாலகுமாரன்.
அந்த இடம் இனி என்றென்றும் நிரந்தர காலி இடமாகவே ரஜினியின் வாழ்வில் இருக்கும்.
ஈடு சொல்ல முடியாத சிறப்போடு நடந்து முடிந்தது இந்த உலகத்தில் எழுத்தாளர் பாலகுமாரனின் வாழ்க்கைப் பயணம்.
ஆம். இதுதான் அழகு.