முதல்வர் மு.க. ஸ்டாலின் கடைபிடிக்கும் தனித்துவ தலைமை

தமிழ்நாடு முதல்வர் மு.க. ஸ்டாலினின் ஆட்சி பற்றி தி.மு.க உறுப்பினர்களோ, ஆதரவாளர்களோ புகழ்ந்தால் அதில் ஆச்சரியம் ஏதுமில்லை. ஆனால் கடந்த அ.தி.மு.க ஆட்சியில் அமைச்சர் பொறுப்பு வகித்த செங்கோட்டையன், ஒன்பது முறை சட்டசபையில் உறுப்பினராக இருந்து வருகிறேன். இதுவரை இல்லாத அளவுக்கு பேரவை கண்ணியத்துடன் நடைபெற்று வருகிறது எனப் புகழாரம் சூட்டுகிறார். 

செங்கோட்டையனின் பேச்சு வெறுமனே ஸ்டாலினின் தலைமைக்கு கொடுக்கப்படும் பாராட்டாக மட்டுமில்லை, ஜெயலலிதா, எடப்பாடி பழனிசாமி மற்றும் ஓ.பன்னீர்செல்வம் ஆகியோர் முதல்வர்களாக இருந்தபோது, அவர்கள் செய்ய தவறிய விஷயங்களை சுட்டிக்காட்டும் விதமாகவே இருக்கின்றது. யாரும் எதிர்பாராத செங்கோட்டையனின் கருத்து அ.தி.மு.க வட்டாரங்களில் சலசலப்பை ஏற்படுத்தியது. 

ஆட்சிக்கு வந்த ஒரு சில நாட்களிலேயே தி.மு.க.வினரால் அம்மா உணவகம் தாக்கப்பட்ட போது, அதற்கு உடனடியாக நடவடிக்கை எடுத்தது தி.மு.க தரப்பு. 

தமிழக அரசுப் பள்ளிகளில் வழங்கப்படும் விலையில்லா புத்தக பையில் ஜெயலலிதா, எடப்பாடி பழனிசாமி ஆகியோரது புகைப்படங்கள் இருந்த காரணத்தினால் அவை வினியோகிக்கப்பட மாட்டாது என்று சொல்லப்பட்ட நிலையில், மாணவர்கள் நலனுக்காக நீக்க வேண்டாம் என்று பள்ளிக்கல்வித் துறைக்கு நேரடியாக உத்தரவிட்டார் ஸ்டாலின். இந்த நடவடிக்கைக்கு பல்வேறு தரப்பினர் பாராட்டுகளை தெரிவித்தனர். 

தி.மு.க ஆட்சிக்கு வந்தால் அ.தி.மு.க ஆட்சியில் கடைபிடிக்கப்பட்ட திட்டங்களை ரத்து செய்வது, மீண்டும் ஆட்சி மாறினால், தி.மு.க அரசின் திட்டங்களைக் கிடப்பில் போடுவது என்ற பதில் நடவடிக்கைகள் தொடர்ந்து வந்த அரசியல் கலாச்சாரத்தைத் தான் தமிழக மக்கள் பார்த்திருக்கிறார்கள். அப்படியான அரசியல் பண்பாட்டில் வந்த தமிழக அரசியல் சூழலில், ஸ்டாலினின் செயலும் நடவடிக்கையும் பலரை ஆச்சரியப்படுத்தியுள்ளது. 

சட்டப்பேரவை கூட்டத்தொடரின் போது, பாட்டாளி மக்கள் கட்சியின் சட்டமன்ற உறுப்பினர் ஜி.கே.மணி கேள்வி நேரத்தின்போது எழுப்பிய வினாவுக்கு, முதல்வர் ஸ்டாலின் நேரடியாக பதில் அளித்தார். கடந்த 10 ஆண்டுகளில் சட்டமன்ற உறுப்பினர் ஒருவர் கேட்கும் கேள்விக்கு முதல்வர் பதில் அளித்திருப்பது இதுவே முதல் முறையாகும்.

இப்படி பாராட்டுகளை பெற்று வரும் முதல்வரின் செயல்பாடுகள் குறித்து மாற்றுக் கட்சி என்ன நினைக்கிறது என்று கேட்க, பா.ஜ.க.வின் செய்தித் தொடர்பாளர் நாராயணன் திருப்பதியை தொடர்பு கொண்டோம். அவர், ஒரு மாற்றுக் கட்சியினரை தமிழக அரசு மதிக்கும் போக்கு கட்டாயம் வரவேற்க்கத்தக்கது தான். அரசியல் நாகரீகம் அறிந்து யார் செயல்பட்டாலும் அதற்கு பாராட்டலாம். அதே நேரத்தில் தமிழக அரசின் இந்த செயலானது தொடருமா என்பது கேள்விக்குறி என்று கூறினார். 

அரசியல் ஆதாயத்துக்காகவும், பொது வெளியில் நற்பெயரை ஏற்படுத்திக் கொள்வதற்கு மட்டுமே முதல்வர் ஸ்டாலின் இப்படி நடந்து கொள்கிறாரா என்று கேள்வி எழுப்புவோருக்கு எல்லாம் பதில் கூறும் விதமாக, தி.மு.க.வின் செய்தித் தொடர்பாளர் ராஜீவ் காந்தி கூறுகையில்

மாற்றான் தோட்டத்து மல்லிகைக்கும் மணமுண்டு என்று அண்ணா சொல்லியிருக்கிறார். அதை பின்பற்றும் முதல்வர் ஸ்டாலின், மற்ற கட்சியினரை கண்ணியத்தோடும் மாண்போடும் நடத்துகிறார். 

கடந்த பத்து ஆண்டுகளில் தமிழ்நாட்டில் முதல்வர்களாக இருந்த ஜெயலலிதா, ஓ.பி.எஸ் மற்றும் ஈ.பி.எஸ் என அனைவருமே தங்களை ஒரு மன்னரைப் போலவே எண்ணிக் கொண்டார்கள். அதனால், அவர்களால் மாண்போடு நடந்துகொள்ள முடியவில்லை. 

முதல்வர் பதவி என்பது மக்களுக்கு சேவை செய்ய கிடைத்த ஒரு பெரும் பொறுப்பு என்பதை நன்கு அறிந்தவர் மு.க.ஸ்டாலின். அதனால்தான் அதற்குரிய ஆளுமையுடன் நடந்து கொள்கிறார் என்று விளக்கினார்.