கிளிநொச்சி மாவட்டத்தின் பூநகரி மற்றும் கரைச்சி ஆகிய பிரதேசங்களில் நிலவும் கடும் வரட்சி காரணமாக பெருமளவான குடும்பங்கள் குடிநீர் பெற்றுக் கொள்வதில் பெரும் சிரமங்களை எதிர்நோக்கி வருகின்றன.

கிளிநொச்சி மாவட்டத்தின் பூநகரி பிரதேச செயலாளர் பிரிவுக்குட்பட்ட பல கிராமங்கள் குடிநீர் நெருக்கடியை எதிர்கொள்ளுகின்ற பிரதேசங்களாக காணப்படுகின்றன.  இதனால் தற்போதைய வரட்சி நிலைமை மற்றும் குடிநீர் விநியோகத்துக்கான எரிபொருள் இன்மை காரணமாக குடிநீர் பெற்றுக் கொள்வதில் பெரும் சிரமங்களை எதிர் நோக்கி வருவதுடன் கால்நடைகள் குடிநீர் தேடி அலைகின்ற நிலைமையும் காணப்படுகிறது.

குறிப்பாக கிளிநொச்சி மாவட்டத்தின் பூநகரி பிரதேச செயலாளர் பிரிவுக்குட்பட்ட ஞானிமடம் சித்தங் குறிச்சி செம்மண் குளம் போன்ற பிரதேசங்களில் சுமார் 136க்கும் மேற்பட்ட குடும்பங்களும் செட்டிகுறிச்சி கறுக்காய் தீவு போன்ற கிராமங்களில் 245 க்கும் மேற்பட்ட குடும்பங்களும் குடிநீரை பெற்றுக் கொள்வதில் பெரும் நெருக்கடி நிலைகளை எதிர் கொண்டு வருகின்றனர்.

இந்தப்பிரதேசங்களை ஊடறுத்து தேசிய நீர் வளங்கள் வடிகால் அமைப்புச் சபையினுடைய குடிநீர் விநியோக இணைப்புகள் வழங்கப்பட்டிருந்தாலும்குறித்த இடங்களுக்கு இதுவரை குடிநீர் விநியோகம் மேற்கொள்ளப்படவில்லை இதனால் குறித்த பிரதேசத்தில் வாழும் மேற்படி குடும்பங்கள் தமக்கான குடிநீர் பெற்றுக் கொள்வதில தொடர்ந்தும் நெருக்கடி நிலைகளை எதிர்கொண்டு வருகின்றன.

இதே போன்று பூநகரி பிரதேசத்தில் கால்நடைகளுக்கு கூட தண்ணீர் இல்லாத நிலையில் கால்நடைகளும் நீர் தேடி அலையும் ஒரு அவல நிலையை அவதானிக்க கூடியதாக உள்ளது .தமது பிரதேசங்களுக்கு குடிநீர் விநியோகத்திற்கான பல்வேறு திட்டங்களை நடைமுறைப்படுத்துவதாக வாக்குறுதிகள் வழங்கப்பட்டு வருகின்றனவே தவிர கடந்த 10 ஆண்டுகளுக்குள் இதுவரை எதனையும் நடைமுறைப்படுத்தாது தாங்கள் தண்ணீருக்கு அலையும் அவலத்தை தொடர்ந்து வேடிக்கையாக பார்க்கின்றார்களா ?என்ற கேள்வியை பிரதேச மக்கள் எழுப்பி உள்ளனர்.