'அவசரநிலை பிரகடனம்' இந்திரா எடுத்த தவறான முடிவு: ராகுல் காந்தி!

1975 ஆம் ஆண்டில் தனது பாட்டியும் முன்னாள் இந்திய பிரதமருமான இந்திரா காந்தி விதித்த அவசரநிலை ஒரு தவறான செயல் என்றும், அடுத்த 21 மாதங்களில் நடந்தவை மிகப்பெரிய தவறு என்றும் காங்கிரஸ் தலைவர் ராகுல் காந்தி ஒப்புக் கொண்டார்.

அவசர காலங்களில் அரசியலமைப்பு உரிமைகள் மற்றும் சிவில் உரிமைகள் இடைநிறுத்தப்பட்டபோது, ஊடகங்கள் கடுமையாக தடைசெய்யப்பட்டன. பல எதிர்க்கட்சித் தலைவர்கள் சிறையில் அடைக்கப்பட்டனர் என்று ராகுல் காந்தி தெரிவித்தாலும், தற்போதைய சூழ்நிலையுடன் ஒப்பிடும்போது அடிப்படையில் அவசரநிலை வேறுபட்டது என்றும் கூறினார்.

அது ஒரு தவறு என்று நான் நினைக்கிறேன், நிச்சயமாக அது ஒரு தவறு தான். என் பாட்டி அவ்வளவுதான் சொன்னார். ஆனால் காங்கிரஸ் எந்த நேரத்திலும் இந்தியாவின் அடிப்படைக் கட்டமைப்பைக் கைப்பற்ற முயற்சிக்கவில்லை. வெளிப்படையாக சொல்வதானால் அதற்கான திறன் கூட காங்கிரசிடம் இல்லை. காங்கிரசின் சித்தாந்தம் எங்களை அவ்வாறு செய்ய அனுமதிக்காது என்று புகழ்பெற்ற பொருளாதார நிபுணர் கவுசிக் பாசுவுடன் ஒரு வீடியோ கான்பெரன்ஸ் உரையாடலின் போது கூறினார்.

இந்தியாவின் சுதந்திரத்திற்காக போராடிய, நாட்டுக்கு அதன் அரசியலமைப்பைக் கொடுத்த, சமத்துவத்திற்காக நின்ற காங்கிரசில் தான் எப்போதும் உள் ஜனநாயகத்தை ஆதரிப்பதாக ராகுல் காந்தி கூறினார்.