மலையாள நடிகர் இன்னசென்ட் மறைவு

மலையாள நடிகர் இன்னசென்ட். இவர் தமிழில் லேசா லேசா, நான் அவளை சந்தித்தபோது உள்ளிட்ட படங்களில் நடித்து இருக்கிறார். காமெடி, குணசித்திர கதாபாத்திரங்களில் 750-க்கும் மேற்பட்ட படங்களில் நடித்துள்ளார். 

சிறந்த நடிப்புக்காக கேரள அரசு விருதுகளை பெற்றுள்ளார். மலையாள நடிகர் சங்க தலைவராகவும் பதவி வகித்துள்ளார். இன்னொசென்டுக்கு தற்போது 75 வயது ஆகிறது. இவருக்கு ஏற்கனவே தொண்டை புற்றுநோய் ஏற்பட்டு சிகிச்சைக்கு பின் குணம் அடைந்தார். 

சில தினங்களுக்கு முன்பு மீண்டும் அவருக்கு உடல்நல குறைவு ஏற்பட்டு கவலைக்கிடமான நிலையில் கொச்சியில் உள்ள தனியார் ஆஸ்பத்திரியில் அனுமதிக்கப்பட்டார். பரிசோதனையில் மீண்டும் அவருக்கு புற்றுநோய் பாதிப்பு இருப்பது தெரியவந்தது. அவருக்கு மருத்துவர்கள் தீவிர சிகிச்சை அளித்து வந்தனர். அவரது உடல்நிலை தொடர்ந்து மோசம் அடைந்தது. 

எக்மோ கருவிகள் உதவியுடன் அவருக்கு சிகிச்சை அளிக்கப்பட்டு வந்தது. ஆனாலும் உடல்நிலை தொடர்ந்து கவலைக்கிடமாகவே இருந்து வந்தது. இந்நிலையில் சிகிச்சை பலனின்றி நடிகர் இன்னசென்ட் நேற்று இரவு காலமானார். மருத்துவமனையின் அறிக்கையின்படி, அவர் கொரோனா தொற்று, சுவாச நோய்கள், பல உறுப்புகள் செயல்படாதது மற்றும் மாரடைப்பு காரணமாக உயிரிழந்ததாக தெரிவிக்கப்பட்டுள்ளது. 

இன்னசென்ட் மறைவுக்கு திரையுலகினர் இரங்கல் தெரிவித்து வருகின்றனர். நடிகர் இன்னசென்ட் மறைவிற்கு கேரள முதல்-மந்திரி பினராயி விஜயன் இரங்கல் தெரிவித்துள்ளார். அவர் வெளியிட்டுள்ள இரங்கல் செய்தியில், "தன் தன்னிச்சையான நடிப்பால் ரசிகர்களின் மனதில் நீங்காத இடம் பிடித்தவர் நடிகர் இன்னசென்ட். அவர் ஒரு சிறந்த கலைஞராகவும், சமூகச் சூழலையும் மக்களின் வாழ்க்கையையும் தொட்ட ஒரு பொது ஆர்வலராகவும் இருந்தார். 

திரையுலகின் பல்வேறு துறைகளில் முத்திரை பதித்தவர். குணச்சித்திர நடிகராகவும், நகைச்சுவை நடிகராகவும், தயாரிப்பாளராகவும் சிறந்து விளங்கினார். எப்போதும் இடதுசாரி மனநிலையைக் கடைப்பிடிக்கும் அவர் இடதுசாரி ஜனநாயக முன்னணியின் வேண்டுகோளின்படி மக்களவை வேட்பாளராக அவர் களமிறங்கியதையும், வெற்றி பெற்ற பிறகு, நாடாளுமன்றத்தில் கேரளாவின் கோரிக்கைகளை முக்கியமாக எழுப்பியதையும் கேரளா நன்றியுடன் நினைவு கூரும். 

கடைசி வரை உறுதியுடன் நோயை எதிர்த்துப் போராடி, தனது சொந்த வாழ்க்கையின் மூலம் இன்னசென்ட் ஒரு சிறந்த முன்னுதாரணமாக விளங்கினார். நோயைக் கேட்ட மாத்திரத்தில் மயங்கி விழும் பலரிடையே நோய்த் தொல்லை இருந்தபோதிலும் அவர் தனது தனிப்பட்ட மற்றும் பொது வாழ்க்கையை தன்னம்பிக்கையுடன் மேற்கொண்டார்" என்று தெரிவித்துள்ளார்.