கோடையை எப்படி சமாளிப்பது?

கோடையை எதிர்நோக்க தொடங்கியிருக்கிறோம். இந்த சூழலில் உடல் ஆரோக்கியம் குறித்து நினைக்கும் இல்லத்தரசிகள் வீட்டில் இருக்கும் வளரும் சிறுவர்கள் மற்றும் வயதானவர்கள் மீது தனி கவனம் செலுத்த வேண்டும்.

கோடைக்காலத்தில் வெப்பநிலை 40 டிகிரி செல்சியஸ்க்கு மேல் இருக்கும் போது நீங்கள் எச்சரிக்கையுடன் இருக்க வேண்டும். குறிப்பாக குழந்தைகளை வெளியில் விளையாட அனுமதிக்கும் போது இதை கவனத்தில் கொள்வது நல்லது.

 குழந்தைகளை அதிகப்படியான வெயில் நேரத்தில் வெளியே விட வேண்டாம். குறிப்பாக நண்பகல் 12 மணி முதல் மாலை 3 மணி வரை வெளியே அனுப்ப வேண்டாம். மற்ற நேரங்களில் வெளியில் செல்லும் போது தண்ணீர் பாட்டிலோடு அனுப்புங்கள் ஆடைகள் இறுக்கமில்லாமல் தளர்வாக பருத்தி ஆடைகளை மட்டும் போட்டுவிடுங்கள்.

நீரிழப்பு அபாயம்

 பெரியவர்களுக்கு தான் இந்த நீரிழப்பு உண்டாகும் என்று நினைக்க வேண்டாம். குழந்தைகளுக்கும் இந்த பிரச்சனை வரக்கூடும். கோடைக்காலங்களில் வியர்வை அதிகமாக இருக்கும். வியர்வை போன்று சிறுநீர் வழியாகவும் உடலில் இருக்கும் திரவம் இழப்பு அதிகரிக்கிறது.

 சிறுவர்கள் இயல்பாகவே போதுமான தண்ணீர் குடிப்பதில்லை. இந்நிலையில் உடலில் நீரிழப்பு என்பது அதிகமாகவே இருக்கும். அதோடு விளையாடுவதால் வியர்வையும் அதிகமாக இருக்கும்.

 குழந்தைகள் சிறுநீர் கழிக்கும் போது அடர்ந்த மஞ்சள் நிறத்தில் வந்தால் அவர்களுக்கு நீர்ச்சத்து பற்றாக்குறை என்பதை தெரிந்துகொள்ளுங்கள். இயன்றவரை குழந்தைகளுக்கு போதுமான அளவு நீர் கொடுக்க முயற்சியுங்கள். உடன் திரவ ஆகாரமான இளநீர், நீர்ச்சத்து நிறைந்த பழங்கள் சரியான இடைவெளியில் கொடுப்பதன் மூலம் நீரிழப்பு அபாயம் உண்டாகாமல் தடுக்கலாம்.

கொப்புளங்கள்

 வெப்ப கொப்புளங்கள் அதிக உபாதை தரக்கூடியது. பெரும்பாலும் குழந்தைகளுக்கு தான் உடலில் கொப்புளங்கள் வரக்கூடும். குறிப்பாக மண்ணில் விளையாடும் குழந்தைகள் வியர்வையோடு மண்ணும் சருமத்தில் ஒட்டிகொள்ளும் போது அவை கொப்புளங்களை ஊக்குவிக்க செய்யும்.

 உடலின் உள்ளும் வெளியும் படும் வெப்பம் கொதித்து கொப்புளங்களாக வெளியேறும். இதை சரியாக கவனிக்காவிட்டால் மிகப்பெரிய சிக்கலை உண்டாக்கிவிடும். கொப்புளங்கள் பரவக்கூடும். இது மிகப்பெரிய உபாதையாகவே இருக்கும்.

உணவு மற்றும் நீர் மூலம் பரவும் #நோய்கள்

 பொதுவாக மழைக்காலங்களில் தான் நீரில் பரவும் நோய்கள் அதிகமாக இருக்கும் என்று நினைக்கலாம். ஆனால் கோடை காலங்களிலும் காலரா, டைபாய்டு, மஞ்சள் காமாலை, வயிற்றுப்போக்கு போன்ற நீரினால் பரவும் நோய்கள் குழந்தைகள் வெளியில் சாப்பிடும் போது சுகாதாரமற்ற நிலையில் தெருவோரங்களில் சாப்பிடும் போது உண்டாக வாய்ப்புண்டு.

 குழந்தைகளுக்கு உணவு வழியாகவும் ஆரோக்கிய குறைபாடு உண்டாகலாம். பாக்டீரியாக்கள் வெப்பமான நேரத்திலும் மற்றும் ஈரமான சூழலிலும் செழித்து வளர்கின்றன. உணவு நச்சு மற்றும் உணவு தொற்றூ காரணமாக நோய் உண்டாவது கோடைக்காலத்தில் அதிகமாக இருக்கும் என்பதால் வெளி இடங்களில் உணவு உண்பதை தவிர்க்க செய்வது நல்லது.

சின்னம்மை

 கோடையில் குழந்தைகளுக்கு வரக்கூடிய பொதுவான நோய்களில் சின்னம்மையும் உண்டு. இது உடல் முழுவதும் திரவம் நிறைந்த சிறிய கொப்புளங்களாக வரக்கூடும். இது குழந்தைகள் போன்றே நீரிழிவு நோயாளிகள், பலவீனமான நோய் எதிர்ப்பு சக்தி கொண்டவர்களையும் தாக்க செய்யலாம்.

 இந்த தொற்று நோய் காற்றின் வழியாக பரவுகிறது. இது பாதிக்கப்பட்ட நபர் இருமல் அல்லது தும்மும் போது பரவுகிறது. இந்த பாதிப்பு தீவிரமானால் அது மோசமான பாதிப்பை உண்டாக்கிவிடும்.

ஃபுட் பாய்ஸன்

உணவு வீட்டில் தயாரிக்கும் போது கவனம் தேவை. ஏனெனில் கோடையில் ஃபுட் பாய்ஸன் என்பது கோடையில் பரவும் மற்றொரு நோய் ஆகும். இது அசுத்தமான உணவு தண்ணீரின் மூலம் பரவக்கூடும் என்றாலும்  சமைத்த உணவு கோடை காலத்தில் விரைவாக கெட்டுப்போகும் அது ஃபுட் பாய்ஸன் உண்டாக்கலாம்.