மீனவர் பிரச்சினைக்கு தமிழ் நாட்டு அரசாங்கமே தீர்வை காண முன்வரவேண்டும் - அன்னராசா வலியுறுத்து

கடந்த அரசாங்கம் மீனவர்களின் நலன்கருதி கிடப்பில் போட்ட சட்டத்தை தற்போதைய அனுர தலைமையிலான அரசாங்கம் மீளவும் நடைமுறைப்படுத்த இரகசியமான முறையில் முயற்சிப்பதற்கு தாம் எதிர்ப்பை தெரிவிப்பதாக சுட்டிக்காட்டியுள்ள அகில இலங்கை மீனவர் மக்கள் தொழிற்சங்க வடமாகாண இணைப்பாளர் அன்னலிங்கம் அன்னராசா குறித்த சட்டத்தை இல்லாது செய்வதற்கு நடவடிக்கை எடுக்க வெண்டும் எனவும் வலியுறுத்தியுள்ளார்.

அத்துடன் இலங்கை – இந்திய மீனவர் பிரச்சினை தொடர்பில் கடந்தகால ஜனாதிபதிகள் வெளிப்படையாக பேசாவிட்டாலும் பிரச்சினை உள்ளதை வலியுறுத்தியிருந்தனர். ஆனால் தற்போதைய ஜனாதிபதி அனுர குமார திசநாயக்க அது தொடர்பில் வெளிப்படையாக பேசியுள்ளார் எனவும் சுட்டிக்காட்டியுள்ளதுடன் அனுர தலைமையிலான அரசாங்கமாவது மீனவர் பிரச்சினைக்கு தீர்வை பெற்றுத்தர வேண்டும் என தெரிவித்துள்ளார்.

குறித்த சங்கத்தின் வருடாந்த இறுதிக் கூட்டம்  இன்றையதினம் 31) யாழ்ப்பாணத்தில் தனியார் விடுதியில் இடம்பெற்றது. அதன்பின்னர்  ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் இதனை தெரிவித்துள்ளார்.

இது தொடர்பில் அவர் மேலும் தெரிவிக்கையில் -

அதேவேளை கடற்றொழில் அமைச்சரும் பிரச்சினையை தீர்ப்பேன் தீர்ப்பேன் என்று கூறிவருகின்றார். ஆனால் தினமும் எங்களுடைய கடல்வளமும் வாழ்வாதாரமும்  இலங்கை இந்திய அரசுகளால் அழிக்கப்படுகின்றது.

குறிப்பாக இலங்கை மற்றும் இந்தியாவில் தடைசெய்யப்பட்ட இழுவை மடி தொழில்களை பயன்படுத்தியே எங்களது வாழ்வாதாரம் பாதிக்கப்பட்டு வருகின்றது.

இந்த புதிய அரசாங்கம் எமக்கு கொடுத்த கால அவகாசம் இன்றுடன் நிறைவுறுகின்றது  ஆனாலும் இதுவரை எந்த தீர்வும் கிடைக்கவில்லை் இராஜதந்திர ரீதியில் பேச்சுவார்த்தைகள் ஆரம்பிக்கப்பட வேண்டும்.

குறிப்பாக இலங்கை – இந்திய மீனவர் பிரச்சினைக்கு இந்திய மத்திய அரசாங்கம் அல்ல தமிழ் நாட்டு அரசாங்கமே தீர்வை காண முன்வரவேண்டும்இ அவர்களுடனேயே பேச்சுக்கள் முன்னெடுக்கப்பட வேண்டும்.

இதேநேரம் இதுவரையான காலத்தில் தமிழ் நாட்டு அரசாங்கம் மத்திய அரசின் பக்கம் பிரச்சினையை தட்டிவிட்டு தொடர்ந்தும் சட்டவிரோத செயற்பாடுகளை மேற்கொண்டு வருகின்றது. இதை ஏற்கமுடியாது என்றும் தெரிவித்துள்ளமை குறிப்பிடத்தக்கது

000