நடிகை கே.ஆர். விஜயாவின் நல்லதொரு பண்பு

இது ஒரு நடிகையைப் பற்றிய செய்தி என்றாலும் நாம் அனைவரும் கற்றுக் கொள்ள வேண்டிய நல்லதொரு பண்பு அது !

13 வயதிலேயே நடிக்க வந்து விட்டாராம் கே. ஆர். விஜயா.

1963 இல் வெளிவந்த முதல் படம் 'கற்பகம்' சூப்பர் ஹிட். தொடர்ந்து வரிசையாக பல படங்கள்.

பலப்பல சோதனைகள் அவமானங்கள் அத்தனையையும் தன் வாழ்க்கையில் பார்த்து விட்டார். இரண்டு மூன்று முறை சினிமாவே வேண்டாம் என்று ஒதுங்கிப் போனாலும், யாராவது ஒருவர் மீண்டும் சினிமாவிற்குள் அழைத்து வந்து நடிக்க வைத்து விடுவார்கள்.

பழைய அவமானங்களை மறந்துவிட்டு மீண்டும் சினிமாவில் நடித்து சூப்பர் ஹிட் வெற்றிப் படங்களைக் கொடுப்பார் கே ஆர் விஜயா. ஆனால் எதிர்பாராமல் ஒரு சில படங்கள் தோல்வி அடைவது உண்டு.

கே. ஆர்.விஜயாவை ஹீரோயினாக நடிக்க வைத்து, இயக்குநர் மாதவன் 'முகூர்த்தநாள்' (1967) என்ற ஒரு படத்தைத் தயாரித்தார். மிகுந்த எதிர்பார்ப்போடு தயாரிக்கப்பட்ட படம். ஆனால் எதிர்பார்த்தது போல ஓடவில்லை. ஏகப்பட்ட நஷ்டம்.

அடுத்த சில நாட்களில் கே ஆர் விஜயாவின் வீடு தேடிச் சென்றார் இயக்குநர் மாதவன்.

வரவேற்றார் கே.ஆர்.விஜயா: “வாங்க சார், உட்காருங்க ..!”

உட்கார்ந்தார்.

சுடச்சுட காபி கொண்டு வந்து வைத்து விட்டுச் சென்றார் பணிப் பெண்.

புன்னகையுடன் கேஆர் விஜயா,

"சாப்பிடுங்க சார் !"

ஒன்றும் பேசாமல் காபி சாப்பிட்டுவிட்டு காலி கோப்பையைக் கீழே வைத்தார் இயக்குநர் மாதவன்.

அதன் பின்...

கைகளைத் துடைத்துக் கொண்டு, கையில் வைத்திருந்த பையில் இருந்து, கட்டு கட்டாக பணத்தை எடுத்து அதை கே.ஆர்.விஜயாவின் கைகளில் கொடுத்தார். எதுவும் புரியாமல் கே ஆர் விஜயா, "என்ன சார் இது ?"

மாதவன் : "நான் தயாரித்த முகூர்த்த நாள் படத்துக்காக நாம் ஏற்கனவே பேசிக்கொண்ட உங்களோட சம்பளப் பணம்."

கே ஆர் விஜயா தயக்கத்துடன், "சார், படம் சரியாக போகவில்லை என்று கேள்விப்பட்டேன்."

"உண்மைதான். ஆனாலும் படம் தயாரிக்க ஆரம்பிக்கும் முன்பே, ஒப்பந்தத்தில் நான் கையெழுத்து போட்டுக் கொடுத்திருக்கிறேனே !"

என சோகப் புன்னகையுடன் சொல்லி, பணத்தைக் கொடுத்து விட்டு,

"நான் வருகிறேன்" என தளர்வான நடையோடு தனது வீட்டுக்குப் புறப்படத் தயாரானார் மாதவன்.

“ஒரு நிமிஷம் இருங்க சார்” என்று சொன்ன கே.ஆர்.விஜயா, அத்தனை பணத்தையும் எடுத்துக் கொண்டு பூஜை அறைக்குச் சென்று, சாஸ்திரத்துக்கு ஒரு சிறு தொகையை மட்டும் கையில் எடுத்துக்கொண்டு, மீதிப் பணம் முழுவதையும் அப்படியே இயக்குனர் மாதவனின் கைகளில் கொண்டு வந்து கொடுத்து விட்டு, கை எடுத்து வணங்கி, கண்களில் கண்ணீரோடு இப்படிச் சொன்னாராம் :

“சார்.. நான் அடிக்கடி சொல்வேனே... மறந்துட்டீங்களா..?

இந்த சினிமா வாழ்க்கையில் நான் பட்ட அடிகளும் அவமானங்களும் ஏராளம். என்னுடைய ஆரம்ப கால வாழ்க்கையில் பல பேர் என்னை நடிக்க வாய்ப்பு தருவதாகச் சொல்லி ஏமாற்றி பணம் தராமல் போய் இருக்கிறார்கள். அப்போதெல்லாம் கண்ணீர் விட்டு அழுது இருக்கிறேன். ஆனால் அந்த நேரத்தில் ஒரு உறுதியான முடிவை எடுத்தேன். என் வாழ்நாளில் என்னால் யாரும் ஒரு ரூபாய் கூட நஷ்டப்படக் கூடாது. அந்த உறுதியான முடிவை நான் ஒருநாளும் மறக்க மாட்டேன் சார்..!"

இப்படிச் சொல்லிவிட்டு......

கே. ஆர். விஜயா பணத்தை திரும்பவும் இயக்குநர் மாதவன் கைகளில் கொடுக்க, பேச வார்த்தைகள் எதுவும் வராமல், கண்கள் கலங்க, பதிலுக்கு கை கூப்பி வணங்கி விட்டு, அங்கிருந்து புறப்பட்டார் மாதவன்.

கே ஆர் விஜயாவுக்கு பெற்றோர் வைத்த பெயர் 'தெய்வநாயகி'...... எவ்வளவு பொருத்தமான பெயர் !

Info

Category:

Actress

Created:

2025-06-21T06:55:15+0000

Updated:

2025-06-21T06:55:15+0000