பிரிக்கப்படாத அன்றைய இராமநாதபுரம் மாவட்டத்தில் இன்றைய சிவகங்கை மாவட்டத்தில் பிறந்தவர். சிவகங்கை மாவட்டம் மானாமதுரைதான் இவர் பிறந்த ஊர்.

மானாமதுரையில் கோவில் திருவிழாக்களில் போடும் வள்ளி திருமணம், அரிச்சந்திர மயான காண்டம் போன்ற தெருக்கூத்து நாடகங்களை பார்த்து ரசித்து தன் நடிப்பு திறனை வளர்த்துக்கொண்டார், அடுத்த நாள் அது போலவே நடித்துக்காட்டுவாராம் இவர். எஸ்.வி சகஸ்ரநாமம் நாடகக்குழுவில் இணைந்து பணியாற்றி பின்பு சினிமாவுக்கு வந்துள்ளார்.

தமிழில் மனோரமா- மற்றும் காந்திமதி எண்ணற்ற தமிழ்படங்களில் பாட்டி, அம்மா கதாபாத்திரம் செய்தவர்கள். இதுபோல கதாபாத்திரம் செய்ததில் இவர்கள் phd பட்டம் பெற்றவர்கள் என சொல்லலாம். அவ்வளவு தத்ரூபமாக நம்ம வீட்டு பாட்டி மாதிரியும், அம்மா மாதிரியும் தத்ரூபமாக நடிப்பார்கள்.

எந்த பெண் நடிகையின் குரலையும் மிமிக்ரி ஆர்ட்டிஸ்ட் பெரும்பாலும் மேடையில் பேசி வெளிப்படுத்த மாட்டார்கள், ஆனால் காந்திமதியின் குரலை வெளிப்படுத்தி இருப்பார்கள். என அழகு ராசா என காந்திமதி சொல்வது அப்படியே அள்ளிக்கொள்வது போல் இருக்கும். சித்தாட கள்ளி விறகு ஒடிக்க போனாளாம் கத்தாழ முள்ளு கொத்தோட குத்துச்சாம் என இவர் பேசும் பாடிலாங்வேஜும் சரி, அந்த டயலாக்கை வெளிப்படுத்தும் விதமும் சூப்பரா இருக்கும்.

ஏவிஎம் நிறுவனம் சென்னைக்கு செல்வதற்கு முன் காரைக்குடியில் தான் ஏவிஎம் ஸ்டுடியோவை நடத்தியது. தேவகோட்டை ரஸ்தாவில் அந்த ஸ்டுடியோ இருந்தது. அங்கேதான் வேதாள உலகம் எனும் படம் எடுக்கப்பட்டது. சொந்த மாவட்டத்தில் இருந்த ஸ்டுடியோவில் தயாரிக்கப்பட்ட வேதாள உலகத்தில் தான் காந்திமதி முதன் முதலில் சினிமாவில் அறிமுகமாகி இருக்கிறார். இருப்பினும் ஜெய்சங்கர் அறிமுகமான இரவும் பகலும் படம் தான் இவர் நன்கு எல்லோருக்கும் தெரிந்த வகையில் அறிமுகமான படம்.

அடிமைப்பெண், தேடி வந்த மாப்பிள்ளை என அடுத்தடுத்து நடித்த காந்திமதி ஏபி நாகராஜன் இயக்கிய திருமலை தென்குமரி படத்தில் ஒரு நல்ல பிராமண பாட்டி வேடத்தில் நடித்திருப்பார்.

ப்ளாக் அண்ட் ஒயிட் படங்களில் சின்ன சின்ன வேடங்களில் நடித்தாலும் இவரின் பெயர் தனித்து தெரியவில்லை. பாரதிராஜாவின் 16 வயதினிலே படத்தில் இவர் நடித்த குருவம்மா பாத்திரம் தான் அனைவரிடத்திலும் இவரை தெரியவைத்தது. பக்கத்து வீட்டு பெண்களுடன் எதற்கு எடுத்தாலும் லக லக என சண்டை போடும் இயல்பான கிராமத்து பெண் பாத்திரம் இவருக்கு கொடுக்கப்பட்டிருந்தது. அதன் பிறகு ஒவ்வொரு படமாக புகழடைந்தார். அடுத்து மண்வாசனை படத்தின் கிழவி கேரக்டர். மாந்தோப்பு கிளியே படத்தில் கஞ்ச மகா பிரபுவாக வரும் சுருளிராஜனுடன் இவர் சேர்ந்து செய்திருந்த காமெடி நன்றாக இருந்தது நல்ல புகழை வாங்கி கொடுத்தது.

இப்படி இவரின் புகழ் டாப் கியரில் பறந்தது. எல்லாருக்கும் பிடித்த தெரிந்த கதாபாத்திரம் கரகாட்டக்காரன் பாத்திரம், நகையோட போன தம்பி சண்முகசுந்தரத்தை தவறா நினைச்சு பகைய வளர்த்துக்கொள்ளும் கதாபாத்திரம். அந்த சிரிக்கி மக சிரிக்கி வரட்டும் என இவர் டயலாக் பேசும் பாணி வேற லெவல்.

மல்லுவேட்டிமைனர், சந்தனக்காற்று,பெரிய வீட்டு பண்ணக்காரன், கும்பக்கரை தங்கையா, வால்டர் வெற்றிவேல், ஆணழகன் , முத்து , இது நம்ம பூமி, மாணிக்கம் என எண்ணற்ற படங்களில் அன்றைய முன்னணி ஹீரோக்கள் அனைவருடனும் இணைந்து நடித்திருப்பார்.

வால்டர் வெற்றிவேல் படத்தில் நிராதராவன பெண்மணியாக இருந்து ஒரு குடும்பத்தை தாங்கி பிடிக்கும் வேராக இவர் நடித்திருக்கும் கதாபாத்திரம் எனக்கு மிகவும் பிடிக்கும். ஒரு கட்டத்தில் சத்யராஜ் வீட்டு மாப்பிள்ளையை அரெஸ்ட் செய்ய வரும்போது சத்யராஜை தடுப்பார் காந்திமதி, அப்போ சத்யராஜ் நீ யாரு எங்க குடும்பத்து விசயத்துல தலையிட என்ற வகையில் சொல்ல மனம் கலங்கி போவார்.

அதுபோல் தேவர் மகன் படத்தில் க்ளைமாக்ஸ் தேரோட்ட காட்சிக்கு முன் கமலுடன் சிரித்து பேசி மகிழ்வார், யய்யா எப்படி இருக்க என கமலை ஆரத்தழுவி மகிழ்வார், சிறிது நேரத்தில் ஏற்பட்ட தேர் விபத்தில் கை கால் எல்லாம் தனியாக கிடக்கும் காந்திமதியின் உடலை பார்த்து கமல் கதறி அழுவார். இந்த காட்சியிலும் காந்திமதி சிறப்பாக நடித்திருப்பார்.

அதுபோல் மணிவண்ணன் இயக்கிய சின்ன தம்பி பெரிய தம்பி படத்தில் வீட்டை விட்டு ஓடிப்போன மகள் பல வருடம் கழித்து அழகான பேத்தியுடன் வந்தாலும், நடந்ததை மறந்து சேர்த்துக்கொள்ளாமல் வைராக்கியத்துடன் மகளை ஏற்றுக்கொள்ளாமல் விரட்டியடிப்பது, பின்பு அவர்கள் விபத்தில் காலமானது தெரிந்து தனது மகள் பிள்ளை பேத்தி நதியா மீது பாசத்தை கொட்டுவது என கலக்கி இருந்தார். மகன்கள் இருவர் மீதும் பாசத்தை கொட்டுவது, அதிலும் சத்யராஜ் தவறான வழிகளில் செல்லும்போது அவர் மீது வரும் வெறுப்பு போன்றவைகளில் நல்ல நடிப்பை வெளிப்படுத்தி இருப்பார்.

சொல்லும் விசயத்தை கேட்ச் செய்து அதை விட பிரமாதமாகவே நடித்து தருபவர் காந்திமதி அவர்கள். தனது 71வது வயதில் 2011ல் காலமானார் காந்திமதி.