இந்திய விஞ்ஞானி சர் ஜெகதீச சந்திர போஸ் நினைவு தினம்

இன்று (நவம்பர் - 23) இந்திய விஞ்ஞானி சர் ஜெகதீச சந்திர போஸ் நினைவு தினம் (1937).

மார்க்கோனிக்கு முன்னரே கம்பியில்லா ஒலிபரப்பு அமைப்பினை போஸ் கண்டு பிடித்தார்; இருப்பினும் அஃது அறிவியல் உலகினரால் கவனிக்கப் படாமல் போய்விட்டது. 22 மி.மி. முதல் 5 மி.மி. வரையான அலைநீளம் கொண்ட மின்காந்த அலைகளை (electromagnetic waves) உருவாக்கவும் அவற்றின் பகுதி-ஒளித் (quasi-optical) தன்மைகளைக் கண்டறியக்கூடியதுமான ஒரு கருவியைப் போஸ் கண்டுபிடித்தார். அனைத்து வகையான தூண்டல்களுக்குமான (stimuli) பொதுவான மின் துலங்கல்களையும் (responses) கண்டறிந்தார்.

மிகக் குறைந்த அலை நீளமுடைய நுண்ணலைகளை உருவாக்கும் ஓர் எந்திரத்தை இவ்வுலகில் முதன் முதலில் வடிவமைத்த பெருமை போஸ் அவர்களையே சாரும்.புதியதோர் ஒளிப்படக் கோட்பாட்டை (photographic theory) அவர் உருவாக்கினார். 

 வெப்பம், குளிர், ஒலி, ஒளி ஆகிய புறத்தூண்டுதல்கள்  தாவரங்களையும் பாதிக்கின்றன என்பதை நிரூபித்தார். 

1915 - ம் ஆண்டு லண்டன் ராயல் கழகத்தில் போஸ் அவர்கள் “புறத் தூண்டுதல்களுக்குத் தாவரங்கள் எவ்வாறு பொறுமையுடன் நடந்து கொள்ளுகின்றன” என்பதைப் பற்றி ஒரு சொற்பொழிவு நிகழ்த்தினார். தாமே வடிவமைத்துத் தயாரித்த  கருவிகளின் துணை கொண்டு பல் வகையான செயல் முறை விளக்கங்களைச் செய்து காட்டினார். 1920 - ம் ஆண்டு லண்டன் ராயல் கழகத்தின் உயர் நிலை உறுப்பினர் பதவியைப் பெற்றார்.